Ons ontwerpershuis het 'n Taaltuin™!
Baie welkom by ons skryfafdeling. Ons Taaltuin™ word in vier seisoene verdeel en bestaan uit: Lewenslesse, Digkuns, Dapperdagboek-inskrywings en Die Stigter se plasings.
Ons Taaltuin™ is 'n uitlaatklep en versameling van my skryfkuns. Hier plant ek my losgedagtes op sosiale media soos wat ek my lewenspad stap. Hierdie Taaltuin™ het nie taalversorgers nie, daarom is dit heeltemal moontlik dat onkruid, soos taalfoute en verkeerde sinkonstruksies, kan opduik.
Ons skryfkuns word op ons sustersblad, Ons Taaltuin™, gedeel. Hiermee word jy vriendelik uitgenooi om saam met ons buite te speel.
Ideaal, want dis digi-taal.™
Ek het al baie lesse in my lewe geleer. Jy ook! In hierdie seisoen deel ek elke maand 'n lysie van 10 lewenslesse wat ek in daardie maand geleer het. Hier is 'n voorbeeld van vyf lewenslesse wat ek die afgelope jaar geleer het:
"Ek lees 'n anonieme plasing waar iemand skryf dat om geduldig te wees nie noodwendig gaan om vir iets te wag nie, maar eerder jou gedrag terwyl jy vir iets wag. Goeie goed vat tyd. Mag jy kry na dít wat jy soek. En as jy daarvoor moet wag ... hoop ek dat jy geduldig daarvoor sal wag."
- Hilde Kruger, 2024
'N BOERVROU SE TRANE
Grafstil staan ek voor jou klip versteen.
Jou lewenslyn tussen twee datums ingraveer.
Die dood neem en in ruil daarvoor bring dit finaliteit.
Swaar lê die klip van jou afwesigheid.
Ek verlang na jou en sit met vrae.
Ek en jy. Tot in lengte van dae.
Wat as. Wat as.
Wat as jy as was?
Sou jou graf veiliger wees?
Sou jy verkies om in die see te wees?
Hoe voel dit dan om sorgvry te wees?
Ek het vir jou veldblomme gebring.
Miskien sal die engele vir jou my hooglied kan sing.
My gebede droog op.
Hou kop. Hou kop.
Hoe vul 'n mens jou spore?
Die plaas rou saam en lyk lankal verlore.
Wat gaan van jou skape word?
Watter maaltye bedien ek nou op 'n bord?
My liewe Boer, jy het al die antwoorde.
Net jammer jy lê nou diep tussen die boorde.
Môre begin ons ploeg.
Ons almal is moeg.
Rus sag. Rus sag.
Ek weet jy sal vir my aan die einde van die grondpad wag.
Om blomme te gee versinnebeeld soms die idee dat iemand iets mooi gaan soek het om jou te wys dat hulle aan jou gedink het. Hulle soek iets mooi, want daar is 'n stukkie in jou wat mooi is vir hulle.
- Hilde Kruger, 2023
My naam, Hilde, beteken dapper, vegter of oorlog. Dis dapper om kanse te waag en jou gedagtes met die res van die wêreld te deel. Ek deel dit, omdat die kanse goed is dat lesers daarby aanklank kan vind en hulself daarmee kan vereenselwig.
Dapperdagboek-inskrywing is 'n versameling van resensies en introspeksies. Hier skryf ek asof die leser saam met my die ervaring beleef, nuwe mense ontmoet en aan dieper dinge van die lewe dink.
"Ons kan ons plek volstaan deur uit te staan. Ons is nie vir plekke gemaak nie, ons is gemaak om plek te skep. Ek verkies die vryheid bo enige boks wat in my rigting gegooi word."
- Hilde Kruger, 2024
Op Maandae deel ek my meningstukke met die res van die wêreld op al ons sosiale media blaaie. Ek skryf hoofsaaklik oor persoonlike ervarings, verskillende uitdagings van die lewe en hoe ons na dinge vanuit verskillende hoeke kan kyk.
Hierdie inskrywings is veronderstel om vir jou hoop te gee en jou te los met die wete dat jy nie alleen is nie. Dis ook 'n manier om my deur ons handelsmerk te leer ken.
Ons hou van briewe en wil graag van jou hoor! Stuur vir ons 'n vonkpos.